Søknadsweb opnar i midten av mai for bachelorstudentar. Bachelorstudentar søkjer innan 1. juni for utveksling i vårsemesteret i neste kalenderår. Søknadsweb opnar 22. januar for masterstudentar. Masterstudentar søkjer innan 2. februar for utveksling i påfylgjande akademiske år, haust eller vår.

Bachelorstudentar på siste år som skal ha intern overgang til master, kan søkja innan 2. februar om å dra på utveksling i sitt 2. semester på masteren. Søknadsprosessen er den same som for masterstudentar.

Me sakshandsamer ikkje utvekslingssøknadar til studentar som allereie har fått tilbod om plass i GSM-, CEMS- eller dobbelgradprogrammet, eller Innovation School. Vilkårsbundne tilbod på desse programma (t.d. i avventning av TOEFL-resultat) blir også rekna som tilbod, og utvekslingssøknaden din vil ikkje behandlast.

• Søk i Søknadsweb

  Søk i Søknadsweb

  GÅ TIL SØKNADSWEB

  • Vel "Ny Søknad". Fram til søknadsfristen kan du bruka "Mine Søknader" for å endra søknad og "Mine Dokument" for å endra opplasta dokumentasjon.
  • I Søknadsweb kan du priortera opptil 20 vertsinstitusjonar. Somme vertsinstitusjonar har fleire campusar, og du må søka på rett campus. Du kan søka på fleire campusar på ein vertsinstitusjon.

• Søknadsdokument

  Søknadsdokument

  • Dersom du er bachelorstudent og skal søka til Rikkyo, må du legga ved eit motivasjonsbrev
  • Dersom du søker til MBA-plass der det på oversikten er oppgitt krav om arbeidserfaring, må du legga ved CV med arbeidserfaring
  • Dersom du søker på ein vertsinstitusjon med språkkrav, må du legga ved dokumentasjon på språkkunnskapar. For engelsk språkkrav treng du ikkje å leggja ved dokumentasjon på dette ved søknadstidspunktet, men du må passa på at du har dokumentasjonen på plass innan du eventuelt får tilbod frå universitetet/høgskulen.
  • Dersom du har hatt tilpassa studieløp eller gyldig permisjon, må du legga ved dokumentasjon
  • Last opp alle dokument samla i ei PDF-fil med namnet ditt som dokumenttittel.

• Språkkunnskapar

  Språkkunnskapar

  • Somme vertsinstitusjonar har krav til språkkunnskapar. Du kan ta valfag innanfor språk på NHH som ein del av din bachelorgrad.
  • Engelsk: Nokre vertsinstitusjonar har spesifikke krav til dokumentasjon av engelskkunnskapar, t.d. karakteren 4 eller betre i engelsk frå vidaregåande skule. I lista over utvekslingsstadar er slike krav oppførte for dei vertsinstitusjonane det gjeld. Det er ditt ansvar å passa på å samla all dokumentasjon for alle vertsinstitusjonane du søker på. Du treng ikkje legga ved dokumentasjon av engelskkunnskapar når du søkjer NHH om plass, men må kunna legga ved dokumentasjon når du søkjer direkte til vertsinstitusjonen.
  • Tysk/fransk/spansk: Viss du søker fransk-, tysk- eller spanskspråklege vertsinstitusjonar som underviser på lokalspråket, må du kunna dokumentera at du har eller vil oppnå språkkunnskapar tilsvarande to modular (15 studiepoeng) i det respektive språkvalfaget før du reiser ut. Merk at språkfag frå vidaregåande skule ikkje er tilstrekkeleg. Dokumentasjonen må leggast ved når du søkjer i NHHs opptak. Språkemne teke ved NHH vil liggja i systemet vårt og må ikkje dokumenterast ytterlegare.

• Korleis takkar eg ja eller nei til ein plass?

  Korleis takkar eg ja eller nei til ein plass?

  • Du takkar ja eller nei til den tildelte plassen i Søknadsweb innan oppgitt svarfrist.
  • Du kan berre godta eller avslå tilbodet ditt; det er ikkje mogleg å endra destinasjonen din til ein annan institusjon, sjølv om den institusjonen rangerer lågare på preferanselista di enn institusjonen du har fått eit tilbod frå.
  • Det går ikkje an å endra svaret sitt, sjølv før fristen har gått ut. Tenk gjennom før du svarar på tilbodet. Viss du takket ja eller nei ved eit uhell, kontakt seksjon for internasjonale relasjonar i god tid før fristen.
  • Skal du seia ifrå deg plassen du er blitt tildelt, må du takka nei i Søknadsweb. Det er viktig at du frigjer plassen slik at me kan nytta han i supplering- og restplassuttaket. Derfor må du tenkje svært nøye gjennom om du er motivert til å dra på utveksling, både før du søkjer og før du takkar ja til eit tilbod. Om du trekkjer deg frå utveksling seinare på året, vil plassen ikkje lenger kunna brukast av nokon andre.
  • Om du skal på utveksling til Europa (utanom Sveits og Storbritannia), er du ein Erasmus+ student og er plikta til å gjera deg kjent med Erasmus+ Student Charter (PDF, 273 kb) før du takkar ja til plassen.
  • Du kan også setja deg på venteliste for ein eller fleire av institusjonane som du har prioritert høgare enn tilbodet du fekk. Du kan gjera dette anten du godtek tilbodet eller ikkje, og også om du ikkje fekk nokon tilbod. For meir informasjon om ventelista, les nedanfor.

• Korleis fungerar venteliste (suppleringsopptak)?

  Korleis fungerar venteliste (suppleringsopptak)?

  Studentar som ikkje får tilbod om plass ved fyrstevalet sitt, kan få tilbod om ventelisteplass.

  • Du kan takka ja til både tilbod og ventelisteplass. 
  • Takkar du ja til venteliste i hovuduttaket og får tilbod om utvekslingsplass i suppleringsuttaket ('venteliste-opptaket'), mistar du automatisk plass frå hovuduttaket. Viss du ikkje får nytt tilbod i suppleringsuttaket, behaldar du tilbodet du takka ja til i hovuduttaket. 
  • Du kan også takka nei til tilbodet i hovuduttaket og ja til venteliste. Dersom du då ikkje får tilbod om plass i suppleringsuttaket, får du dessverre ikkje delta i restplassuttaket.
  • Du kan velja for kvar enkel plass om du vil setja deg på venteliste eller ikkje.
  • Det går ikkje an å endra svaret sitt, sjølv før fristen har gått ut. Tenk gjennom før du svarer på tilbod om venteliste. Viss du takket ja eller nei ved eit uhell, kontakt seksjon for internasjonale relasjonar i god tid før fristen.

• Kva betyr «ikkje kvalifisert» i søknaden min?

  Kva betyr «ikkje kvalifisert» i søknaden min?

  Nokre av partnarinstitusjonane våre har spesifikke krav for å kvalifisera til opptak. For ei liste over moglege krav og korleis du oppfyller dei, sjå ovanfor under «søknadsdokument». Du finn dei gitte krava for alle institusjonar på nettsidene våre for utvekslingsstader bachelor og utvekslingsstader master.

  Om du ikkje oppfylte kravet/krava, vil søknaden din til den gitte institusjonen bli merkt som «ikkje kvalifisert» i Søknadsweb.

  Du vil ikkje kunna søkja om ventelisteplass ved den gitte institusjonen.

  Å bli diskvalifisert for ein gitt institusjon påverkar ikkje søknaden din til andre institusjonar på noko måte.

• Kan eg byta plass eller søka på restplassar?

  Kan eg byta plass eller søka på restplassar?

  • Alle som ikkje fekk tilbod om utvekslingsplass i hovudopptaket, får tilbod om å søka på restplass. 
  • Studentar som har fått tilbod om utvekslingplass i hovudopptaket, vil ikkje få tilbod om å søka på restplass. 
  • Tilbodet om restplass og informasjon om restplassopptaket vil verta sendt til din NHH-mail. 
  • Du kan ikkje byta den plassen du har fått tildelt i hovudopptaket, heller ikkje til ein skule du hadde lenger nede på prioriteringslista.

• Søk vertsinstitusjonen om opptak

  Søk vertsinstitusjonen om opptak

  • Alle studentar som får tilbod om ein utvekslingsplass frå NHH, må også søka vertsinstitusjonen om opptak. For å få opptak må du hugsa på å: fylgja søknadsfristar og svarfristar, oppfylla eventuelle språkkrav, oppretthalda eventuelle karakterkrav,  betala eventuelle skulepengar og halda ein høfleg tone i korrespondanse med vertsinstitusjonen.
  • Du vil motta informasjon om korleis du søker om opptak, bustad og visum frå vertsinstitusjonen per e-post etter at NHH har nominert deg.
  • Hugs at alle vertsinstitusjonar har ulike krav til søknadsdokument, ulike tidspunkt for fristar, og at dei sender ut informasjon til studentar på ulike tidspunkt. Du skal difor ikkje uroa deg om du ikkje har fått informasjon frå vertsinstitusjonen medan andre studentar har fått ein e-post.