Arbeidslivet i framtida
Kva slags jobb skal du velje? Og kvifor er ei god utdanning den beste vegen til ein interessant jobb?
Arbeids- og næringslivet er i stadig omstilling. Mange nye jobbar blir skapte kvart år, og omtrent like mange blir lagde ned. Ein viktig skilnad på jobbane som blir lagde ned og dei nye som blir skapte, er at dei nye stiller stadig større krav til kompetanse. Utviklinga fører òg til at det blir færre og færre jobbar igjen til ufaglærte.
For å få tilgang til desse nye jobbane som blir skapte, er utfordringa for ungdom å skaffe seg nødvendig kompetanse. Kompetansen oppnår ein gjennom å ta utdanning, anten ved å skaffe seg ein god fagkompetanse gjennom yrkesutdanning eller ved å starte på høgare utdanning. Sjansen for å få ein jobb du trivst i og synst er interessant, aukar om du vel ei retning du er interessert i. Når ein skal velje utdanning, bør ein bruke fornufta, men òg følge hjartet.
Meir fokus på kompetanse
Arbeidslivet er i kontinuerleg endring. Kunnskap står sentralt, og arbeidslivet får fleire og fleire kompetansearbeidsplassar som krev høgare utdanning. Dette kravet om meir kompetanse ser ein på alle nivå i arbeidslivet. Samstundes er det framleis behov for meir og betre yrkesfagleg kompetanse. Samfunnet treng begge delar.
Det er først og fremst teknologisk endring og større konkurranse frå utlandet som er grunnen til at næringslivet etterspør meir kompetanse. Ny teknologi, som til dømes robotar, erstattar tilsette i rutineoppgåver og effektiviserer prosessane. Dette er godt nytt for produktiviteten, og dermed for grunnlaget for velferdssamfunnet vi har bygd opp.
Spesialistar får meir lønn
Den teknologiske utviklinga gjer at bedriftene treng fleire tilsette som kan installere og programmere robotane til ulike oppgåver. Det blir konkurranse om arbeidstakarane som har denne utdanninga og kompetansen, noko som gjer at arbeidsgjevarane er villige til å betale dei høgare lønn.
Samstundes blir enklare oppgåver, som til dømes lønnsutbetaling og rekneskapsoppgåver, flagga ut til bedrifter i utlandet som kan gjere jobben billegare. Andre, meir kompliserte oppgåver knytte til det same blir verande i bedrifta og blir enda meir spesialiserte. Igjen er bedriftene villig til å betale meir for tilsette som har denne spesialkompetansen. Liknande endringar skjer på alle nivå i arbeidslivet.
Resultatet av desse endringane er at utdanning blir meir verd for bedriftene, og lønningane går opp for dei som har valt å ta meir utdanning i staden for inga eller kort utdanning. Har du ei utdanning, har du òg lågare sjansar for å bli arbeidslaus.
Nordmenn tek meir utdanning
Utdanningsnivået blant nordmenn aukar stadig, ifølge SSB sin statistikk Befolkningens utdanningsnivå. Statistikken viser at 35,3 prosent av oss hadde utdanning på universitets- og høgskulenivå i 2020. Om vi delar opp etter kjønn, ser vi at 39,8 prosent av kvinner og 30,8 prosent av menn hadde utdanning på universitets- og høgskulenivå. Sjølv om utdanningsnivået i Noreg har auka, er det ikkje veldig høgt samanlikna med andre land. Blant anna er prosentdelen nordmenn som tek mastergrad, lågare enn gjennomsnittet i OECD-landa.
Andre tema under Folkehelse og livsmestring
Internasjonal trend
I dei fleste land i Vesten som har ein økonomi som liknar på vår, er meir kompetanse eit krav som har blitt viktigare og viktigare i arbeidslivet dei siste tiåra. Omstillingstakta ser heller ikkje ut til å minke. Vi står no overfor det grøne skiftet der ny teknologi skal utviklast, tilpassast og takast i bruk. Nye forretningsmodellar skal utviklast og driftast. Då er det vanskeleg å tenkje seg at yrke som krev kompetanse og høgare utdanning, som til dømes økonomar, blir overflødig med det første.
Mange utdannar seg i håp om å få ein jobb med høgare lønn. Avkastninga blir målt som skilnaden i lønn mellom utdanna og ikkje-utdanna arbeidstakarar. Det er ikkje noko ved utviklinga i arbeidslivet som tydar på at avkastninga på å ta utdanning vil avta, verken når det gjeld yrkesretta eller meir akademisk utdanning.
-
Kahoot
Kahoot
Etter å ha høyrt podkasten og lest teksten, kva hugser du? Spill Kahoot (bildelenke)!
