Vi rår deg til å søke innpass så tidleg som mogeleg etter at du har starta på NHH. Du bør ikkje vente til det semesteret NHH-emnet undervisast etter normert studieplan. Merk at studentar på Bachelor in Economics, Business and Data Science i studiåret 2024-2025 kun kan søke innpass for emne frå første studieår. 

Søkeportal

Fristen er no ute for å søke om innpass hausten 2024. Det opnast opp for nye søknadar den i januar 2025. 

NB! Dersom du er usikker på om vi har mottatt søknaden din, eller du treng å ettersende dokumentasjon, ver venleg å ikkje sende ny søknad, men ta i staden kontakt med oss på opptak@nhh.no. 

Krav til dokumentasjon

Du må dokumentere følgande i søknaden:

1. Resultatutveksling/karakterutskrift: NHH har resultatutveksling med dei fleste lærestadane i Noreg. Du kan sjå kva resultat vi har tilgang til under "Min profil" i Studentweb. Dersom du har utdanning frå ein lærestad som tillèt resultatutveksling, treng du ikkje laste opp karakterutskrift/vitnemål.
   
   Dersom du har utdanning frå BI eller utlandet, må du laste opp ein digitalt signert karakterutskrift frå Vitnemålsportalen eller ein offisiell karakterutskrift med stempel og underskrift. Utskrifter frå studentportal på nett er ikkje gyldige.
   
   
2. Emneomtale: Alle søknadar må innehalde ein offisiell emneomtale. Merk at det må gå fram av emneomtalen at den gjeld for akkurat det semesteret du tok emnet. Emneomtalen kan vere ein direkte link til lærestaden si heimeside eller ei vedlagt PDF-fil.

Merk at alle dokument må vere i PDF-format. Andre format, samt dokument som inneheld «+», «/», «?» og tilsvarande teikn i filnamnet kan ikkje opnast.

 Du er sjølv ansvarleg for at søknaden du sender inn er komplett.

Kva emne kan innpassast?

Emnet du ønsker innpassa må fylle tre krav:

1. Det må ha same omfang (studiepoeng)som NHH-emnet du søker innpass for.
2. Det må vere på same nivå (bachelor/master) som NHH-emnet du søker innpass for.
3. Det må ha same innhald/læringsutbytte som NHH-emnet du søker innpass for

Liste over tidlegare vurderingar av innpass (1 MB)

Søkeprosessen

• Du må sende inn éin søknad for kvart NHH-emne du ønsker innpass for. Du kan slå saman fleire eksterne emne i same søknad dersom dei dekker ulike delar av innhaldet i NHH-emnet.
• Merk at du ikkje kan få innpass dersom du har eit bestått resultat i NHH-emnet frå før. 
• Ver merksam på at du berre kan få innpass for eitt eksternt emne éin gong, uavhengig av talet på studiepoeng. Dersom du brukar det same eksterne emnet i fleire søknadar, vil sakshandsaminga av alle søknadane dine ta lenger tid. Dersom du får avslag på ein søknad eitt semester, kan du bruke det same eksterne emnet igjen i ein annan søknad neste semester.
• Dersom der manglar noko i søknaden, vil du få melding om det. 
• Dersom du søker innpass for eit emne det undervisast i same semesteret, bør du undervisnings- og vurderingsmelde deg i emnet mens du ventar på svar. Det kan ta tid å få svar på søknaden, og du må vere budd på å ta eksamen i tilfelle avslag.

Svar på søknaden

Du får normalt svar på søknaden innan ein månad etter søknadsfristen. Dersom han krev fagleg vurdering, må du rekne med lenger svarfrist. Du får svar på søknaden i di digitale postkasse. Om du ikkje har oppretta digital postkasse, får du brev i posten. 

Fekk du søknaden innvilga?

Hugs å melde deg av eksamen i emnet innan trekkfristen. Dersom trekkfristen er gått ut før du har fått svar på søknaden, ta kontakt med opptak@nhh.no, så hjelper vi deg.

Merk at innpassa emne ikkje vil telje som studieprogresjonen på NHH. Du må sjølv passe på at du følgjer minstekrava til studieprogresjon for å ikkje miste studieretten, jf. Forskrift om fulltidsstudiene ved Norges Handelshøyskole, § 2-5. 

Emne som er innpassa i graden ved NHH vil ikkje gå fram av foreløpige karakterutskrifter. På vitnemålet vil emnet stå som «innpassa» på norsk og «recognized» på engelsk. Dersom du ønsker å dokumentere karakteren din i emnet, må du legge fram ei karakterutskrift frå lærestaden. 

Har du byrja på BEDS og tatt emne på NHH tidlegare?

• Det er ikkje mogeleg å erstatte obligatoriske emne i BEDS med obligatoriske emne i BØA, verken heilt eller delvis.
• Valemne frå BØA kan i enkelte tilfelle inngå som valemne i BEDS. Kva emne som kan inngå, vert avgjort i god tid før første kull startar i fjerde semester.